Ginpahayag sang Department of Tourism (DOT) nga nagasugod na sa pagbangon ang Pilipinas halin sa pagnubo sang numero sang mga Chinese tourists nga nagasulod sa pungsod, kadungan sang pagtaas sang foreign tourist arrivals, ilabi na halin sa Middle East, Gulf Cooperation Council (GCC), kag India.
Suno kay DOT Secretary Christina Garcia-Frasco, wala nalab-ot ang target nga 7.7 million Chinese tourist arrivals para sa tuig 2024, matapos nakarekord lamang sang 5.9 million sang nagligad nga tuig. Isa sa ginatumod nga rason amo ang pagpang-crackdown sa mga Philippine Offshore Gaming Operators (POGOs).
Bilang sabat, ang DOT nagapasanyog sang pagdamo sang mga merkado sang turismo. Ginreport nga nakakita ini sang 500% tubtob 800% nga pagdamo sang mga turista nga nag-abot gikan sa Middle East kag GCC, bangud sang mga tikang nga nagasabat sa Halal kag Muslim-friendly nga turismo, pareho sang Marhaba Cove sa Boracay kag ang akreditasyon sang mga Muslim-friendly nga mga hotel kag restawran.
Ang DOT nagapabakod man sang kaangtanan sa mga mayor nga merkado sang turismo pareho sang South Korea, Japan, Estados Unidos, Europa, kag Australia. Ang kadamuon sang mga bisita gikan sa South Korea kag Australia padayon nga nagadamo bangod sang pagpasangkad sang koneksyon kag interes sa pag-dive, golf, baybayon, kag adventure tourism.
Dugang pa ni Frasco, nakahanda na ang nagkalain-lain nga destinasyon sa pungsod nga magbaton sang mga turista gikan sa nagkalain-lain nga bahin sang kalibutan.
