Ginpa- Bombo sang isa ka turista ang ginaalegar pagbinastos sa ila sang isa ka staff sa Iloilo City Hall.
Sa interview sang Bombo Radyo kay Dave Billones Reyes, isa ka turista halin sa Tacurong, Sultan Kudarat, iya ginpahayag nga nagpadulong siya sa Iloilo City kaupod ang pila ka senior citizens agud maglantaw sang Dinagyang Festival.
Suno kay Reyes, nagkadto sila sa City Hall agud magbakal sang tickets apang may isa ka staff nga nagminaldita.
Iya ini ginpangalanan nga si Matty Treñas nga ginapahayag nga staff mismo sang alkalde.
Pahayag niya, dismayado gid siya sang nangin aktwasyon sang amo nga indibidwal nga ginlaragway ni Reyes nga tuman ka unprofessional.
Dugang niya, wala gid siya naglaum nga ila ini maeksperyensiyahan sa ginbansagan nga “City of Love” kag ginakabig man nga sister city sang Tacurong.
Samtang, nagsabat ang Iloilo City Government kasunod sang reklamo sang isa ka turista halin sa Tacurong City batok sa isa ka staff sang City Hall nga gin-alegar nagminaldita.
Sa interview sang Bombo Radyo kay Miss Joy Facinal Fantilaga, spokesperson ni Iloilo City Mayor Jerry Treñas, iya ginpahayag nga nagapangayo sila sang pasaylo kun indi man nangin maayo ang eksperyensiya sang tagreklamo nga si Dave Billones Reyes kaupod ang mga senior citizens.
Apang suno kay Fantilaga, gintinguhaan gid nila nga maakomodar si Reyes sa ginhingyo sini nga tickets para sa Dinagyang tribes competition.
Gin-ako naman niya nga apisar indi man tanan may maayo nga impresyon sa syudad, ginapasiguro nila nga mas mapanami pa ang ila pag-amuma sa mga bisita sa iban pa gid nga mga selebrasyon sa Iloilo City.
