TURKEY – Ginpatuman na ang weekend lockdown sa Turkey bangud sa nagataas nga numero sang Coronavirus Disease 2019 (COVID-19).
Suno kay Bombo International Correspondent Gretchen Castañeda, iya ginpahayag nga ang weekend lockdown ang nagtuga sang panic buying apang amat-amat naman ini nga nasulosyunan.
Suno kay Castañeda, ang COVID-19 case sa Turkey ang naglab-ot na sa kapin 100,000 samtang kapin sa 17,000 naman ang naka recover kag masobra sa 2,000 ang patay.
Ginpahayag ni Castañeda nga ang outbreak ang nag-umpisa sa mga may yara sang travel history sa iban nga pungsod kag nagpauli sa Turkey.
Umpisa sang Marso 10, ginpauntat na ang klase, ginsirado ang pila ka commercial establishments kag ginpatuman ang curfew sa mga naga edad sang 20 anyos panubo kag 60 anyos pataas nga ginakabig nga vulnerable ukon madali nga matapikan sang virus.
