ILOILO CITY – Dako nga epekto sa mga manunudlo kag estudyante sang Iloilo City National High School ang pag-mandu sang Office of the Building Official nga pag-vacate sa twin building sang nasambit nga buluthuan bangud ini ang naga-uyog.
Sa interview sang Bombo Radyo kay Isidro Ocate, coordinator sang physical facility sang Iloilo City National High School, iya ginpahayag nga dako nga huol para sa mga estudyante nga mangita sang hulot agud nga mapatigayonan ang klase bangud nga nagakulang man sang mga classrooms ang nasambit nga buluthuan.
Suno kay Ocate, ang twin bulding ang isa ka 2-storey-bulding sa diin may yara sang tatlo ka mga classroom sa dalom, kag tatlo man sa babaw nga bahin.
May mga litik sa dingding kag may mga buho ang salog sang twin bulding sang buluthuan.
Ginpa-vacate sang Office of the Building Official ang twin building kasunod sang mandu ni Iloilo City Mayor Jerry Treñas nga tsekyaron ang mga establisimento ukon istruktura sa syudad kaangot sa asud-asud nga linog sa bahin sang Mindanao.
Pahayag ni Ocate, indi niya mahangpan kun ngaa naga-uyog ang twin building sang buluthuan nga sa pagkamatuod sang 2015 lang gintukod ang nasambit nga istruktura.
Dugang pa sang natungdan, antes pa man ang ginhiwat nga inspeksyon sang Office of the Building Official, nagpatawag ang buluthuan sang pagsinapol kaupod ang Iloilo City Engineer’s Office kag Department of Public Works and Highways agud kuntani nga tsekyaron ang twin building nga naga-uyog sa kahangawa nga mahimo mag collapse, apang napaslawan ang mga ini nga magtambong.
