Nagalaom ang tag-iya sang tyangge nga nalakip sa hit and run sa Distrito sang La Paz, kaagahon sang Oktubre 11 nga mabayaran ini sang doctor nga nagtuga sang amo nga insidente.
Sa interview sang Bombo Radyo kay Jonalyn Castillon, tag-iya sang tyangge, iya ginpahayag nga ginpahibalo lamang siya nga gin-arado sang salakyan ang iya tyangge samtang wala siya sa ila baligyaan.
Suno kay Castillon, ang tyangge amo ang ila ginakuhaan sang ila kinahanglanon sa adlaw-adlaw nga tanan, gani dako nga kapierdehan para sa ila kon indi mabayran ang mga guba sa ila tyangge.
Nahibaluan nga base sa impormasyon, wala nag-untat ang driver sang Honda Accord matapos maarado ang tyangge kag nagpadayon lamang ini sa pagdalagan tubtob nakalab-ot sa Barangay Caingin, La Paz, kun sa diin siya nadakpan.
Apisar sang insidente, ginpahayag ni Castillon nga wala siya sang plano nga magpasaka sang kaso batok sa driver, apang ginapangabay niya nga mabayran ang danyos sa iya tyangge.
