Ginkapakigbahin ni U.S. President Donald Trump nga nag-uyon si Chinese President Xi Jinping nga pasudlon ang rare earth minerals kag magnets sa Estados Unidos—isa ka tikang nga posible makapahagan-hagan sang tensyon sa tunga sang duha ka pinakadaku nga ekonomiya sa kalibutan.
Sang ginpamangkot siya samtang yara sa Air Force One kon nag-uyon bala si Xi, nagsabat si Trump nga: “Oo.”
Wala gilayon nakahatag sang komento ang embahada sang China sa Washington sa nasambit nga isyu.
Ginpahayag ini ni Trump isa ka adlaw matapos ang isa ka talagsaon nga paghinun-anon nila ni Xi, nga nagalaum sa pagsulbar sang natuga nga tensyon sa patag sang trading.
Sa amo nga tion, ginsiling ni Trump nga may positibo nga nalab-utan ang ila pag-istoryahanay kag nagdugang nga, wala na dapat sang pamangkot pa parte sa komplikado nga isyu sang Rare Earth products.
Isa ka palatandaan sang paghagan-hagan sang tensyon, amo ang pag-grant sang China sa temporary export licenses sang mga rare-earth suppliers sang tatlo ka nagapanguna nga U.S. automakers.
Ginalauman man ang katapo sang mga top aides ni Trump kag ang Chinese counterparts sa London sa masunod nga Lunes ang dugang nga pagsinapol para sa padayon nga negosasyon.
