ILOILO CITY – Ginduso ni Chinese President Xi Jinping kay US President Joe Biden kag sa mga pungsod nga myembro sang North Atlantic Treaty Organization (NATO) nga magpatigayon sang dialogue kaupod ang Moscow agud nga mauntat na sa labing madali nga panahon ang kinagamo sa Ukraine.
Sa ginpatigayon nga duha ka oras nga video call sa tunga sang duha ka presidente, wala direkta nga ginbasol ni Xi Jinping ang Russia sa natabo nga invasion sa Ukraine.
Base sa statement sang Chinese foreign ministry, ginhambalan ni Xi si Biden nga ang conflict ang indi interes sang duha ka pungsod.
Suno kay Xi, ang top priority subong amo nga nagapadayon ang dialogue kag negosasyon, likawan ang pagkapatay sang mga civilian, punggan ang ano man nga humanitarian crisis kag tapuson ang inaway sa labing madali nga panahon.
Ginsiling man sini nga dapat suportahan sang duha ka partido ang dialogue sa tunga sang Russia kag Ukraine samtang ang Washington kag NATO ang magapatigayon man sang pagsinapol upod ang Russia agud nga masolbar na ang problema sa Ukraine kag ma-resolve ang security concern sang duha ka pungsod.
Ang duha ka dalagko nga pungsod ang dapat nga magrespeto sa isa kag isa kag ipaiway ang “Cold War mentality”, kag untatan ang bloc confrontation.
Una na nga ginpahayag ni US Secretary of State Antony Blinken nga ang Biden administration ang nagakabalaka nga ginasuportahan sang China ang Russia pinaagi sa paghatag sang military equipment nga gamiton batuk sa Ukraine nga gin-deny naman sang China.
Suno kay Blinken, ginlauman nga paandaman ni Biden ang chinese leader nga magapangatubang ang Beijing sang mabug-at nga penalidad kun direkta ini nga nagasuporta sa pagsakop sang Russia sa Ukraine.
Sa subong, nagdangat na sa apat ka semana ang pagsakop sang Russia sa Ukraine kun sa diin, naglab-ot na sa ginatos ang nagkalamatay kag minilyon ang nagpalagyo sa pungsod.
