Ginpahayag ni U.S. President Donald Trump ang pagka-dismaya matapos ang pagpakigsapol sa telepono kay Russian President Vladimer Putin tuhyo sa ginaduso nga ceasefire deal sa Ukraine.
Suno kay Trump, daw wala sang intension si Putin nga untaton ang gyera.
‘I’m very disappointed with the conversation I had today with President Putin, because I don’t think he’s there, and I’m very disappointed,’ suno kay Trump.
‘I’m just saying I don’t think he’s looking to stop, and that’s too bad,’ dugang pa sini.
Wala man na-estoryahan ang temporaryo nga pagpauntat sang Amerika sa pagpadala sang armas sa Ukraine, suno sa report halin sa Kremlin aide nga si Yuri Ushakov.
Matapos ang pila ka oras halin sa ila pag-estoryahanay, gin-report sang mga opisyal sa Kyiv ang ginhimo nga drone attack sang Russia nga nagresulta sang sunog kag baslanay sang lupok sa rehiyon.
Kaangot sini, naka-schedule naman nga makig-estorya si Trump kay Ukrainian President Volodymyr Zelenskiy agud estoryahan ang pagka-delay sang military aid.
Apisar, wala pa napauntat sang amerika ang paghatag sang military aid, ginsiling ni Trump nga naubos na ni former U.S President Joe Biden ang stockpile sang pungsod.
Samtang, ginsiling naman sang Kremlin, bukas sila sa pagpakigsapol, apang dapat direkta ang lamang ini sa tunga sang Russia kag Ukraine, kag wala na sang labot ang Amerika.
