Naghatag sang kakugmat sa mga pasahero sang isa ka ka eroplano ang natabo nga pagpangbuno sang isa ka piloto sa upod man sini nga piloto.
Padulong kuntani sa Israel ang nasambit nga eroplano, apang nag-emergency landing ini matapos ang insidente.
Nagbinuligay naman ang lima ka pasahero sang eroplano agud mapauntat ang suspetsado sa pagpangbuno.
Gilayon naman nga nadakpan ang suspek, samtang luwas naman nga nakuha ang mga pasahero sini.
Gintawag sang Israeli defence minister nga si Israel Katz ang insidente nga “jihadist terror attack”.
Gilayon man nga nagpadala sang eroplano ang Flydubai sa Tabuk Airport sa Saudi Arabia agud kuhaon ang mga pasahero nga na-stranded didto.
Dalayon na nga naghalin ang tropa sang Estados Unidos sa Iraq, matapos ang masobra duha ka dekada nga presensiya militar sini sa pungsod.
Ginselebrar naman sang Iraqi security forces ang paghalin sang US-led coalition, apang nagakabalaka ang iban nga mahimo ini magresulta sa security vacuum ukon kakulangan sa seguridad.
Posible ini nga maghatag sang mas dako nga gahom sa mga armado nga grupo nga suportado sang Iran ukon mag-abri sang kahigayunan para makabalik ang Islamic State ukon ISIS.
Nahibaluan nga nagsugod ang presensiya sang US sa Iraq sang tuig 2003.
Naghalin ang US troops sang 2011, apang nagbalik sang 2014 agud buligan ang Iraqi forces kontra sa Islamic State.
Sang 2014, napaslawan ang Iraqi army sa pagpugong sa Islamic State nga nagresulta sa pagkuha sang Mosul kag iban pa nga lugar.
Naglab-ot naman sa kapin 4,500 ka US soldiers ang napatay sa kagulangan sang Iraq, samtang kapin 200,000 Iraqi civilians ang ginabanta nga nagkalamatay man sa amo nga engkwentro.
