Naghimo sang programa nga ‘Ubra Para sa Masa’ ang chairman sang Committee on Health sa Iloilo City Council agud mabuligan ang mga pumuluyo sang syudad nga wala sang trabaho sa tunga sang COVID-19 pandemic.
Sa interview sang Bombo Radyo kay Iloilo City Councilor Alan Zaldivar, iya ginpahayag nga bilang anay manager sang Public Employment Service Office (PESO), gingamit niya ini nga kahigayunan agud makig-angot sa mga pribado nga establisemento agud i-refer ang mga pumuluyo sang syudad nga natumod nga wala sang trabaho subong nga pandemya.
Suno kay Zaldivar, nagapasalamat man siya bangud ang halos tanan nga aplikante nga ginrefer niya sa mga establisemento nga nagapangita sang empleyado ang lunsay ginhire ukon nabaton sa trabaho.
Magluwas diri suno kay Zaldivar, ginbuligan man nila ang amo nga mga aplikante sa ila nga medical requirements kag naghatag man sila sang ayuda kaangay sang foodpacks.
