Missing ang isa sa pinakabantog nga tech entrepreneur sa Britanya nga si Mike Lynch matapos naabtan sang bagyo kag naglugdang ang ginasakyan nga yate sa Sicily.
22 ka mga tawo ang sakay sa British-flagged “Bayesian” nga sailboat kag naka-angkla malapit sa port sang Porticello sang naglain ang tyempo suno sa Italian coast guard.
Madasig nga nadula ang yate apang antes ini dalayon nga naglugdang sang kaagahon, nakaluwas pa ang 15 ka mga tawo lakip na ang asawa ni Lynch nga amo ang tag-iya sang yate kag isa ka isa-ka-tuig nga bata.
Kumpirmado nga isa ang napatay nga amo ang onboard chef samtang anum ang missing nga nagalakip pa gid sa 18-anyos nga anak nga babaye ni Lynch kag ang British, American kag Canadian nationalities nga wala pa ginhingadlan.
Sa 15 nga nakaluwas, tatlo ang ang nakaangkon sang seryoso nga mga samad sa lawas.
Ang 59-anyos nga si Lynch ang popular sa Britanya bangud sa pagtukod sini sang largest software firm sa pungsod nga amo ang Autonomy halin sa iya ground-breaking research sa Cambridge University.
Ginabansagan siya nga Bill Gates sang Britanya nga ginatangla sang academicians, scientists kag politicians.
