Indi na pag-ipilit ni President Volodymyr Zelensky ang NATO membership para sa Ukraine.
Ang isyu sa pagpa-myembro sa amo nga North Atlantic Treaty Organization amo ang ginapahayag rason kun ngaa nga ginsulod sang Russia ang Ukraine.
Suno kay Zelensky, “I have cooled down regarding this question a long time ago after we understood that … NATO is not prepared to accept Ukraine.”
May pahayag man ang presidente nga may kahadlok ang NATO sa kontrobersyal nga mga isyu kag sa kontrobersiya nga nagalakip sa pungsod nga ginapamunuan ni Russian President Vladimir Putin: “The alliance is afraid of controversial things, and confrontation with Russia,” suno kay Zelensky.
Ginpahayag man ni Zelensky nga indi sini luyag mangin presidente sang pungsod nga nagapang-luhod luhod sa pagpakitluoy.
Una diri, ginpahayag sang Russia nga indi sini gusto ang kaiping nga pungsod Ukraine nga magsulod sa NATO, isa ka transatlantic alliance nga gintukod sa pag-umpisa sang Cold War agud proteheran ang Europa batok sa Soviet Union.
Apang kun madumduman, sang nabungkag ang Soviet Union ukon ang Union of Soviet Socialist Republics (USSR), nagpadayon ang NATO sa pagpalawig sang ila nga teritoryo kag pwersa sa nasidlangan nga bahin kag ginpanglakip sa alyansa ang anay Soviet domains.
Ini ang ginatudlo rason kun ngaa akig ang Russia. Ginalantaw ni Putin ang pagpadaku sang alyansa sang NATO bilang isa ka pamahog.
NEGOSASYON SA RUSSIA
Madumduman nga antes ang pagsulod sa teritoryo sang Ukraine sang Pebrero 24, ginmandu ni Putin nga kilalahon sang Russia bilang independent ang duha ka separatist pro-Russian “republics” sa eastern Ukraine — ang Donetsk kag ang Lugansk.
Ini nga mga rehiyon ang nagaaway batok sa Kyiv (kapital sang Ukraine) halin pa sang 2014. Luyag sang Russia nga kilalahon ini sang Ukraine bilang sovereign kag independent.
Sang ginpamangkot may kaangtanan sa demand sang Russia, ginpahayag ni Zelensky nga bukas ang Ukraine para sa diskusyon.
“I’m talking about security guarantees,” suno sa presidente. “What is important to me is how the people in those territories are going to live who want to be part of Ukraine, who in Ukraine will say that they want to have them in. So the question is more difficult than simply acknowledging them. This is another ultimatum and we are not prepared for ultimatums. What needs to be done is for President Putin to start talking, start the dialogue instead of living in the informational bubble without oxygen,” pahayag ni Zelensky. ##
