Wala sang autonomous sanctions law sa New Zealand apang wala ini nakapugong sa ila prime minister nga magpahilabot man kag magpataw sang sanctions sa Russia bangud sa pag-atake sa Ukraine.
Yari ang lakip sa sanctions suno kay New Zealand Prime Minister Jacinda Ardern:
Una, pagdumili sang byahe sang Russian government officials sa New Zealand kag amo man sa iban nga mga indibidwal nga may labot sa pag-sulod sa Ukraine; buot silingon, indi sila makakuha sang visa nga makasulod sa New Zealand.
Ikaduha, pagdumili sa export sang mga produkto sa Russian military kag security forces.
Ikatatlo, pagsuspinder sa bilateral Foreign Ministry consultations tubtub nga may bag-o nga abiso nga ipa-guwa ang gobyerno.
Sa subong suno kay Bombo International Correspondent Tess Peeters, magatanyag man ang New Zealand government sang bulig sa Ukraine.
May nagahulat man nga mga staff sa eastern Poland agud makabulig sa mga New Zealand citizens nga luyag magbaya sa Ukraine.
