Gin-detain sang mga pulis sa Poland ang renowned Ukrainian boxer kag heavyweight boxing champion nga si Oleksandr Usyk samtang yara ini sa Krakow airport.
Ginkumpirma ini ni Ukraine President Volodymyr Zelenskyy kun sa diin ginpahayag sini nga wala siya nanamian sa pag-tratar sa ila champion apisar pa nga gin-hilway man ini gilayon.
Wala sang ginhatag nga detalye ang presidente apang nagguwa sa reports sang ulihi nga gin-detain si Usyk sang Polish police matapos ini nag-protesta batok sa sala nga akusasyon batok sa iya abyan sa airport.
Ginbatuan sini ang pahayag sang staff sa airport nga hubog ang iya abyan kag indi mahimo makabyahe — bagay nga napamatud-an nga sala bangud gin-check ang iya abyan sa “deep alcohol intoxication” kag negatibo ang resulta.
Bangud sa hitabo, nagtulog si Usyk kag ang abyan sini sa Poland sa sulod sang isa ka gab-i antes nagkadto sa Thessaloniki sa Greece.
Ang 37-anyos nga boksidor nga Olympic gold medalist sang 2012 ang kilala bilang isa sa pina-prominente nga atleta sa Ukraine kag sa luwas sang pungsod kag nagpasakop man kag nag-organisar anay sang mga proyekto nga naangot sa pagpamatok sa Russian invasion.
Nangin mas popular siya sang ginlutos niya si Tyson Fury sang Mayo sa Saudi Arabia kag nangin una nga undisputed world heavyweight champion sa sulod sang 24 ka tuig.
Makaligad sini, ginbakante man ni Usyk ang amo nga undisputed title matapos nga wala sini gin-atubang ang iya mandatory challenger kag sa baylo, nagpasugot nga magsambuwa liwat kay Fury sa isa ka rematch nga natalana sa Disyembre 21 sa Saudi Arabia sa gihapon.
Magluwas nga WBC, WBA kag WBO heavyweight champion, isa man ka undisputed champion si Usyk sa cruiserweight kag wala sang kalutusan sa sulod sang 22 ka mga hampang.
