Nagapabilin nga mataas sa gihapon ang tubig-baha sa pila ka parte sang Iloilo City kasunod man sang mabaskog nga pagbubo sang ulan kagab-i.
Sa interview sang Bombo Radyo kay Darwin Joemil Papa, Operation Officer sang Iloilo City Disaster Risk Reduction and Management Office (CDRMMO), iya ginpahayag nga kalabanan sa may pagbaha nga na-record sang talatapan amo sa Distrito sang Jaro nga ginalakipan sang Brgy. Tagbak, Brgy. Camalig, Brgy. Lanit, Brgy. Balabago kag Brgy. Buntatala.
Suno kay Papa, ang talatapan ang nagpatuman sang assessment agud matumod ang mahimo rason kon ngaa nagdugay ang pagsubside sang tubig-baha sa mga nasambit nga lugar.
Apang, ginpahayag man sang natungdan nga ginalantaw sang CDRRMO kon nakaapekto ang on-going nga repair ukon construction sang Buntatala Creek kon sa diin, isa sa mayor nga alagyan sang water waste.
Wala naman ginadula sang talatapan nga isa man ini sa nangin rason kon ngaa madugay nga magnubo ang baha.
Gintuad man sini nga sa kabug-usan, ang Distrito sang Jaro lamang ang natam-an sang ulan kagab-i.
Ginlaragway man ni Papa nga isa ka ‘minimal’ nga pag-ulan ang nagtupa sa syudad sang Iloilo.
