Naglunsar sang apelar ang United Nations nga buligan ini nga makatipon sang $275 million ukon P15.68-billion para mahatagan sang ayuda ang masobra isa ka milyon nga mga tawo nga apektado sang 7.7 magnitude nga linog sa Myanmar.
Suno sa organisasyon, sa $1.1 billion ukon P62.70-billion nga kinahanglan para sa humanitarian aid plan sa 5.5-million ka mga tawo, singko porsyento pa gid lamang ang napondohan subong.
Sa bag-o nga appeal sang UN, ang target nga mabuligan amo ang 1.1-million nga ginakabig nga pina-vulnerable lakip na ang mga babaye kag kabataan nga may mataas nga risgo nga mag-atubang sang gender-based violence, food insecurity, kag kakulangan sang access sa reproductive health.
Sandig sa report sang UN, masobra sa 6.3 million ka tawo ang may urgent need sang assistance sa areas nga gin-igo sang magnitude 7.7 nga linog sang Marso 28 kun sa diin masobra sa 3,600 ang napatay.
Nahibaluan nga sa subong, may duha pa ka nabilin nga missing nga mga Pinoy sa Mandalay bangud sa amo man nga linog. Duha sa ila kaupdanan nga Filipino teachers ang kumpirmado na nga napatay bangud sa pag-collapse sang ila ginatiniran nga building.
