Magasapol subong nga Lunes ang United Nations Security Council agud nga istoryahan ang pag-atake sang Israel sa Iran pasado alas dos sang kaagahon sang Sabado.
Suno sa council president nga Switzerland, ang Iran mismo ang nag-request sang meeting kag suportado ini sang Algeria, China kag Russia.
Sa sulat ni Iranian Foreign Minister Abbas Araqchi sa 15-member council, ginsiling sini nga ang ginhimo sang Israel ang makabig nga isa ka pamahog sa international peace kag security kag mas ginapagamo sini ang mahuyang na nga daan nga rehiyon sang Middle East.
Matandaan nga may ginpadala nga mga Israeli jets agud maghimo sang airstrikes sa missile factories kag iban pa nga mga site malapit sa Tehran kag sa western Iran sang weekend.
Base sa Iranian authorities, may gin-atake gid man nga sites sa Tehran, Khuzestan kag Ilam provinces apang na-counter nila ini kag limitado lamang ang damage.
May yara man sang apat ka mga soldado sang Iran nga napatay sa amo nga airstrikes.
Balos ini sang Israel matapos ang natabo sang Oktubre 1 sang nagpalupad man ang Iran sang 200 ballistic missiles sa Jewish state.
Nag-apelar naman si UN Secretary-General Antonio Guterres sa tanan nga mga partido nga involved nga untaton na ang military action lakip na sa Gaza kag sa Lebanon kag himuon gid ang tanan nga tikang agud nga malikawan ang all-out regional war.#
