Gin-veto sang Estados Unidos ang resolution sa United Nations Security Council (UNSC) nga naga-demand sang insigida kag permanente nga ceasefire sa tunga sang Hamas kag Israel sa Gaza.
Sa amo man nga resolution, ginsiling nga dapat wala sang nagabalabag sa mga ayuda nga pasulod sa Gaza Strip nga teritoryo sang Palestine.
Apang suno kay Acting U.S. Ambassador to the U.N. Dorothy Shea, indi pagsuportahan sang US ang anuman nga tikang nga wala nagakondenar sa Hamas. Indi man nila pagsuportahan ang resolution nga wala nagapanawagan sa Hamas nga isungka ang ila armas kag magbiya na sa Gaza.
“The United States has taken the very clear position since this conflict began that Israel has the right to defend itself, which includes defeating Hamas and ensuring they are never again in a position to threaten Israel,” pahayag sini sa atubang sang council.
Una naman nga ginbasura sang Israel ang panawagan sa permanente nga ceasefire bangud sa panindugan sini nga indi mahimo magtinir ang Hamas sa Gaza.
Matandaan nga gin-veto man sang US ang resolution sa UN council sang Nobyembre sa idalom pa sang Biden administration bangud ang ceasefire demand ang wala man nagmensyonar sang immediate and unconditional release sang tanan nga hostages.
