Nagpaandam ang United Nations nga posible buhinan ang gina-rasyon nga pagkaon sa mga refugees sa East kag West Africa bangud sa kakulangan sa pondo.
Sandig sa report sang UN World Food Programme, nabuhinan na sang tubtub sa 50 per cent ang rasyon sang three-quarters sang refugees sa East Africa nga ginasuportahan sang UN.
Ang pinakaapektado amo ang mga refugees sa Ethiopia, Kenya, South Sudan kag Uganda.
Ginapahayag nga indi man makasarang ang resources nga available sa UN. Tuman ka taas ang demand suno sa WFP.
Sa West Africa — ilabi na sa Burkina Faso, Cameroon, Chad, Mali, Mauritania and Niger — may “significant” cut man nga ginhimo sa food rations.
Ang ginalantaw nga sunod nga mabuhinan amo ang Angola, Malawi, Mozambique, Republic of Congo, Tanzania kag Zimbabwe.
Una na nga nag-apelar ang WFP sang $426 million ukon P22.9 billion agud nga malikawan ang gutom sa South Sudan kun sa diin asud-asud ang ilinaway kag ang pagbaha nga rason sang pagbiya sang mga tawo sa ila nga balay.
Ang gyera sa Ukraine ang ginatudlo nagpalala sa global refugee crisis kag sa risgo sang kagutom.
Gindugangan sini sang anum ka milyon ang refugees nga nahimo nga mga sibilyan sa flee conflict zones, kag napasaka man ang presyo sang mga balaklon.
Una naman nga ginpasibangdan ni EU foreign policy chief Josep Borrell ang Russia sa pag-” weaponize” sang grain exports paagi sang pag-block sang grains halin sa Ukraine nga amo kuntani ang ihatag sa pigado nga mga pungsod.
Nahibaluan nga antes ang Russian invasion, ang Ukraine amo ang ginakabig isa sa nagapanguna nga breadbasket sa bilog nga kalibutan — naga-export ini sang 12 percent sang wheat nga ginagamit sa bilog nga kalibutan, 15 percent sa corn, kag katunga sang ila nga sunflower oil.
