LAPUZ,ILOILO CITY– Una nga adlaw sang full clearing operastions sa Iloilo City, nangin produktibo
Nangin produktibo ang una nga full clearing operation sa mga national roads sa syudad sang Iloilo.
Ini ang kasunod sa mando ni Presidente Rodrigo Duterte nga hawanan ang tanan nga nagasablag sa national roads.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga gin buylugan sang nagkalain-lain nga departamento sa Iloilo City Government kag ahensya sang gobyerno.
Ang mga departamento sang Iloilo City Government nga nag buylog sa nasambit nga aktibidad amo ang City Legal Office, City Engineering Office, City Assesors Office, Barangay Affairs Office.
Samtang ang mga government offices naman nga nagtambong amo ang Philippine National Police, Highway Patrol Group sang PNP, Land Transportation Office, Department of Public Works and Highways kag Department of Interior and Local Government.
Suno kay Conlu, ginpangkakas ang mga permanent kag non-permanent nga istruktura lakip man ang moving kag non-moving vehicles nga naga balabag sa kilid sang dalan.
Dugang pa sang natungdan, wala na sila naghatag sang abiso sa mga pumuluyo bangud kalabanan sa ila ang kabalo sang nasambit nga operasyon nga ginpatigayon kag sila ang madugay na nga nahatagan sang abiso.
Ang nasambit nga operasyon ang una nga ginpatigayon sa Brgy. Alalasan, Lapuz Iloilo City nga amo ang nagserbe nga pilot barangay sang nasambit nga operasyon.
