ILOILO CITY – Madamo sang mga tawo ang naghulat nga may masakyan sang jeep sa nagkalain-lain nga terminal agud makapadulong sa syudad sang Iloilo kadungan sang pagpa-idalom sa Modified General Community Quarantine.
Sa interview sang Bombo Radyo kay Jose Deocampo, Presidente sang drivers association sa Mohon Terminal, iya ginpahayag nga ginalaoman na niya ang madamo nga pasahero bangud Lunes nga adlaw, schedule sa pagbalik sang mga tawo sa trabaho.
Suno kay Deocampo, 22 ka mga jeep ang nagabyahe padulong sa syudad apang kulang ini sa gihapon bangud sa numero sang mga pasahero nga nagahulat.
Ginasiguro sang asosasyon nga madugangan ang unit sang jeep sa Mohon Terminal agud maakomodar ang tanan nga pasahero.
Sa bahin naman sang Ungka Terminal, ginatinguhaan sang Iloilo City Alliance Operators and Drivers Transport Cooperative nga maakomodar ang tanan nga mga pasahero agud nga makasakay sa modernized jeep.
Pahayag ni Rafael Prudente, Board of Director sang ICAODTC, 28 ka mga units ang nagabyahe sa Ungka Terminal padulong sa syudad sang Iloilo apang 50% lang sa mga pasahero ang mahimo makasakay.
