ILOILO CITY – Nag-abot na sa border sang Ukraine ang una nga shipment sang bag-o nga US military aid package bilang bulig sa padayon nga pakigbato sang Ukraine batuk sa Russia.
Sang Abril 13, gin-anunsiyo sang estados Unidos ang $800-million nga tranche sang equipment para sa Ukraine lakip na ang helicopters, howitzers ukon artillery gun kag armored personnel carriers.
Suno sa isa ka senior Pentagon official, may yara sang apat ka mga flights nagikan sa US ang nag-abot na sa lugar samtang, maapas ang isa pa ka flight.
Ang package ang ginalakipan sang 18 ka 155mm howitzers, 40,000 artillery rounds, 200 ka M113 armored personnel carriers, 11 ka Mi-17 helicopters kag 100 nga armored multi-purpose vehicles.
Bilang kabahin sang American sanctions, madamo sang moderno nga military weapon nga nagagamit sang electronic chips kun sa diin ang main producers amo ang Taiwan kag South Korea, ang duha ka US allies ang nag-untat naman sa pag-export sang produkto sa Russia.
Una na nga nagreklamo ang Russia sa US sa military aid nga ginahatag sa Ukraine kag nagpaandam sang indi mapaktan nga konsekwensya kun magapadayon ini.
