Nagtakop ang una nga gab-i sang Conclave nga wala sang may napilian nga bag-o nga Santo Papa.
9:00 sang Myerkules sang gab-i sa Roma kag alas tres naman kaina sang kaagahon oras diri sa Pilipinas sang nakit-an nga nagguwa ang itom nga aso halin sa chimney sang Sistine Chapel.
Ini nga aso nagakahulugan nga napaslawan ang Cardinal electors nga maka-eleher sang magabulos kay Pope Francis sa una nga hugnat sang pagbinotohay.
Nagakinahanglan ang bag-o nga Pope sang boto sang two-thirds majority. Sa 133 ka mga cardinal, kinahanglan nga may 89 nga makasulat sang isa lang ka pangalan sa ila nga secret ballot papers para nga madesisyunan nga magapungko ang bag-o nga Pope.
Suno sa Vatican, may apat ka balota sa kada adlaw kun sa diin duha sa aga kag duha sa hapon.
Lauman nga magapahuway anay ang mga cardinal kag magatipon sila liwat buwas 10:30 am (oras sa Roma).
Pananglitan wala gihapon sang Santo Papa pagkatapos sang tatlo ka adlaw, untaton anay ang papal election para sa isa ka adlaw sang pagpangamuyo, informal discussions, kag malip-ot nga spiritual exhortation nga himuon sang senior cardinal deacon.
Untaton liwat kag may exhortation naman nga himuon sa kada pito ka dugang nga voting rounds nga wala gihapon sang napilian. Una ini nga himuon sang senior cardinal priest, kag mangin sang senior cardinal bishop kun kinahanglan.
May final pause of prayer, dialogue, kag reflection kun wala pa gid sang mapilian matapos ang 21 votes.
Kun wala man gihapon, magapili ang cardinals sa tunga sang duha mga kandidato nga may pinakamataas nga boto sa nagligad nga voting round. Iga-require sa gihapon ang two-thirds majority apang kun maglab-ot na sa amo nga tion, indi na pagtugutan ang duha ka kandidato sa pagka-Santo Papa nga makaboto.
