Una nga Interagency Territorial Defense Operations Exercise, ginapatigayon subong sa Iloilo

Ginapatigayon subong sa Iloilo ang pinakauna nga Interagency Territorial Defense Operations Exercise sa Visayas nga gintawag nga “Pag-ugyon”.

Ini ang nag-umpisa kaina sang aga kag magalawig tubtob buwas, Hunyo 17.

Ginhiwat ang opening ceremony sa Brgy. Igtuba, Miag-ao.

Magluwas sa Miagao, may yara man sang simulation kag training exercise sa San Joaquin.

Kadungan sang exercises, may mabatian ang publiko nga mga sirena, simulated gunfire, kag rescue kag military activities.

Suno kay Major General Michael Samson, Commander sang 3rd Infanty Division, tuman ka importante ini nga aktibidad para sa pagpasangkad sang ikasarang sang nanuhay-tuhay nga ahensya agud pangapinan ang teritoryo sang Pilipinas.

Kalakip sa mga nagpasakop sa exercise amo ang mga katapo sang militar, kapulisan, mga local government units, kag emergency responders.

Katuyuan sini nga matakos man ang kahandaan sang Iloilo nga magresponde sa mga emerhensya nga naangot sa territorial defense kag pagkaulamid sang mga sibilyan kun may kinagamo.