BUENAVISTA, GUIMARAS – Na-record ang una nga local case sang COVID-19 sa probinsya sang Guimaras.
Santo sa bulletin nga ginpaguwa sang Department of Health Region 6 as of July 28, ang una nga kaso sang COVID-19 sa Guimaras amo ang 22 anyos nga lalaki nga residente sang banwa sang Buenavista, nagatrabaho sa syudad sang Iloilo kag naka-admit sa hospital.
Sa interview sang Bombo Radyo kay Buenavista Mayor Eugene Reyes, iya ginpahayag nga Hulyo 13 sang nagpauli sa Buenavista ang pasyente kag nagbalik sa Iloilo City sang Hulyo 14.
Suno kay Reyes, nagmasakit ang pasyente kadungan sang iya nga pagbalik sa Iloilo rason nga gin-admit ini sa hospital.
Ginpahayag ni Reyes nga ginkuhaan sang swab sample ang pasyente matapos nakitaan sang sintomas sang COVID-19 tubtub nga nakumpirma nga positibo sa virus.
May kaangtanan diri, padayon ang contact tracing sa Guimaras kag Iloilo City.
