Nagsugtanay na sanday anay US President Donald Trump kag Vice President Kamala Harris nga mag-atubangay sa ABC News sa Septyembre 10 para sa isa ka presidential debate.
Ginkumpirma man ini sang network matapos nga nagpahayag si Trump nga handa siya mag-debate batok kay Harris sang pila ka beses antes ang November election.
Sa tatlo ka debate nga iya gin-suhestyon, ginlakip man sini ang conservative network nga Fox News kag NBC.
Sunod man nga ginkumpirma sang bise-presidente nga magatambong siya sa ABC debate kag nagpahayag man nga bukas siya sa dugang mga pag-atubangay.
Mangin moderator sa debate sanday World News Tonight anchor kag managing editor David Muir kag ABC News Live Prime anchor Linsey Davis.
Matandaan nga sang Hunyo, una nga nagsabak ang Republican candidate sa presidential debate apang sang amo nga tion, ang nakaatubang sini amo si President Joe Biden.
Bangud sa pigado nga performance ni Biden, nagtodo ang panawagan nga mag-atras na ini sa eleksyon. Nag-withdraw matuod ang 81-anyos nga Democrat leader kag opisyal nga ginbotohan nga si Harris ang magabulos kag mangin standard bearer sang Democratic Party.
