Gin-report sang Bureau of Animal Industry (BAI) nga may ginapalusot sa Pilipinas nga indi otorisado nga mga bakuna para sa bird flu kag African Swine Fever (ASF) nga gina-alegar halin sa Vietnam kag kaiping nga mga pungsod sa Asya.
Sandig ini sa sulat ni BAI OIC-director Enrico Miguel Capulong kay Customs Commissioner Bienvenido Rubio.
Ginpahayag man nga ginabutang ini nga mga bakuna sa gamay nga tumblers kag plastic glasses, ginabutangan sang dry ice, kag ginatago sa mga bagahe.
Suno kay Capulong, ang pagpasulod sini kag ang posible paggamit sang premature kag indi otorisado nga mga bakuna ang mahimo makatuga pa sang outbreaks sang amo nga mga balatian sa sapat.
Kaangot diri, ginmanduan man ni Rubio ang mga personnel sang Customs nga magpakig-angot sa BAI kun may madakpan nga shipments nga nagasunod sang smuggled nga mga bakuna.
Ginmanduan man ang district collectors, sub-port collectors kag iban pa nga mga personnel nga ipatuman gid ang kontrol agud nga malikawan nga makasulod ini nga mga produkto sa Pilipinas, kag pananglitan may madakpan, igadagdag man ang nagakaigu nga penalidad nga sandig sa layi kag pagsulundan sang Customs.
Una na nga nagpaandam ang mga eksperto nga ang paggamit sang unauthorized vaccines ang mahimo nga makapalapta sang animal disease viruses kag maka-develop sang immunity gani mabuhinan ang efficacy sang available nga authorized nga bakuna.
Sa bahin ni Department of Agriculture (DA) Secretary Francisco Tiu Laurel Jr., ginpasalig sini sa hog raisers nga maaprubahan sang Food and Drug Administration ang ASF vaccine subong nga 2024.#
