Mahimo pa nga makuha sang mga qualified tricycle drivers kag operators sang 3rd district sang Iloilo ang ila unclaimed cash relief assistance sa banwa sang Janiuay.
Sa interview sang Bombo Radyo kay Elizabeth Sevilla, head sang Janiuay Municipal Social Welfare and Development Office, iya ginpahayag nga pagahiwatun ang distribution sang unclaimed subsidy sa banwa sang Janiuay bangud yara pa sa 82 ka mga beneficiaries sa nasambit nga banwa ang wala makakuha sang ila assistance.
Pagahiwatun ini bwas, Abril 28, nga maga-umpisa sa alas-8 sa aga, sa Jibolo Gym sa Janiuay.
Suno kay Sevilla, ginhatagan gid sang tion sang Department of Social Welfare and Development nga liwat nga i-schedule ang mga wala nakakuha sang ila nga mga subsidiya.
Pahayag niya, may ara pa sang masobra 300 ka mga tricycle drivers ang Janiuay nga nagahulat kun malakip sila sa pagahatagan sang subsidiya sang gobyerno matapos nga nagpasa man sila sang mga requirements.
Dugang man ni Sevilla nga magapaidalom pa sa maid-id nga validation ang mga ini agud malikawan nga magdoble ang mabatun sang mga drivers kag mangin patas man para sa tanan nga benepisyaryo.
