ILOILO CITY – “Gin-happy birthday surprise lang kita!”
Ini ang dismayado nga pahayag ni Iloilo City Mayor Jerry Treñas may kaangtan sa memorandum nga ginpapanaug sang Department of the Interior and Local Government (DILG) kaina sang aga may kaangtanan sa flight sang mga locally stranded individuals (LSIs) sa Iloilo City subong nga adlaw, Agosto 22.
“There was never any coordination with the LGU nga may maabot prior to my receiving of the copy of the memorandum of the DILG,” pahayag ni Treñas nga nagatumod sa flight kuntani sang 141 ka LSIs nga ara subong sa Manila.
Suno kay Treñas, nagalibog ang iya ulo bangud, (1) ngaa interesado ang DILG sa sweeper flight nga wala koordinasyon sa LGU, kag (2) ngaa wala ginasunod ang protocol.
Bangud sini, nagpakig-angot si Mayor Treñas kay National Task Force (NTF) against COVID-19 Chairman Delfin Lorenzana kag kay NTF chief implementer Carlito Galvez Jr.
Suno kay Treñas, indi mapilit ang isa ka syudad nga magbaton sang repatriates kun wala ginasunod ang protocol sang LGU.
Suno pa kay Treñas, ginbawi na ang nasambit nga memorandum sang DILG.
Gin-athag sang alkalde nga wala sang problema ang Iloilo City Government sa pag-abot sang mga LSIs bangud gin-lift na ang moratorium para sa LSIs kag ROFs kag bangud nakasapol na siya sa tatlo ka airline companies, apang nagapanindugan ang alkalde nga kinamatarong sa gihapon sang LGU nga mapahibalo ‘prior the flight’ bangud ang LGU ang nagapakaon kag nagagasto sa mga LSIs kun wala pa sang resulta ang swab test.
