ILOILO – Generally peaceful ang assessment sang Police Regional Office VI sa Undas sa Western Visayas subong nga tuig.
Sa interview sang Bombo Radyo kay Pol. Lt. Col. Joem Malong, tagpamaba sang PRO VI, iya ginpahayag nga nangin masinulundon ang publiko sa mga pagsulundan sang National Inter-Agency Task Force kag sang mga local government units.
Subong nga pista-minatay, bangud sang COVID-19 pandemic, ginsiraduhan sa publiko ang mga patyo, memorial parks, columbaria — pampubliko man ukon pribado — umpisa Oktubre 29 tubtob Nobyembre 4.
Suno kay Malong, sa inisyal nga monitoring sang kapulisan, wala sang nagpadulong sa mga patyo sini nga time period.
178 man ka crime incidents ang narekord kag ini ang 49.58 percent nga mas manubo ipaanggid sa 359 ka kaso nga narekord sang nagligad nga tuig (Oktubre 29 tubtob Nobyembre 1).
Wala man sang mga aksidente nga narekord sa mayor nga mga dalanon.
Sa subong, nakadeploy sa gihapon ang pwersa sang mga kapulisan agud masiguro ang kalinong kag pagpatuman sang mga protocol.
Nahibaluan nga sa closure days, nagdeploy ang Police Regional Office 6 sang 800 ka personnel sa 293 ka established Police Assistance Desks sa bug-os nga rehiyon.
Masobra naman sa 2,300 ka PNP personnel ang yara sa Asssistance Hubs sa major highways, cemeteries, airports, seaports, bus terminals, resorts kag malls.
Magluwas diri, may yara man sang 580 ka Road Safety Marshalls nga magapadayon sa pagmonitor tubtob sa Nobyembre 15.
