Wala na ginhulat sang iban ang Nobyembre 1 agud nga makapanglimpyo sa mga patyo.
Sa Tigbauan Catholic Cemetery, isa si Jay Saul sa temprano pa nga nagpaninlo kag nagbalik liwat subong nga adlaw agud masiguro nga preparado na ang pantyon sang iya himata kadungan sang obserbasyon sang Undas.
Pahayag sini, ang Undas isa man sa ginahandaan nga tion sa kada tuig bangud tyempo ini sa pagtilipon sang magpamilya.
Sa interview naman sang Bombo Radyo kay Police Staff Sergeant John Palomo sang First Iloilo Provincial Mobile Force Company (IPMFC), iya ginpahayag nga tubtub sa Nobyembre 2 ang ila nga deployment sa amo nga patyo.
Ginpahanumdom sini nga istrikto gid nga ginadumilian ang pagdala sang mga deadly weapons kag mga ilimnon sa sulod sang patyo.
Magluwas sa ila, may naka-deploy man nga mga force multipliers sa entrada sang patyo agud makabulig sa pagpabilin sang kalinong sa mga magabisita sa ila mga himata.
PARA SA MALINONG UNDAS 2025
Kaina sang aga, ginlibot ni Police Regional Office (PRO-6) Director Police Brigadier General Josefino Ligan ang major transport terminals kag mga patyo sa Iloilo.
Lakip sa iya ginkadtuan amo ang Parola Wharf, Tanza Public Cemetery, Molo Public Cemetery kag Forest Lake Memorial Parks. Ginbisita man sini ang Mohon Ceres Terminal kag Ceres Terminal sa Camalig, Jaro; kag ang Dumangas Port sa Dumangas, Iloilo.
Tuyo sini nga ma-check ang police deployment agud masigurado ang safety sang publiko samtang naga-sinako ang tanan para sa obserbasyon sang tigkalalag.
Nagsaka man ang director sa mga bus kag naghatag sang mga pahanumdom kag safety tips sa mga driver kag mga pasahero.
Sa interview sang Bombo Radyo kay Ligan, iya ginpahayag under control ang security measures sandig sa iya nga assessment kag nakit-an may nga mataas ang police visibility sa convergence areas.
Ginmensyonar man sini ang kooperasyon sang local government units kag transport operators nga nakabulig sa mga byahero.
Nagpahanumdom ini sa mga pulis nga naka-deploy nga indi lang magpungko kundi mag-assist gid sa mga pasahero kag pati sa parking agud malikawan ang mga inaway ilabi na nga nagadali ang tanan.
Halos 4,000 ka mga uniformed personnel ang iga-deploy sa bilog nga Western Visayas kadungan sang Undas lakip na ang masobra 2,700 ka nga kapulisan.#
