Gintawag ni Palace Press Officer Undersecretary Claire Castro nga “lousy script, not award-worthy” ang mga alegasyon sang 18 ka mga anay Marines nga nag-alegar nga nagdul-ong sang bilyones pesos kay Presidente Ferdinand Marcos Jr. kag kay anay House Speaker Martin Romualdez.
Matandaan nga kahapon nga adlaw sa isa ka press conference, kaupod si Atty. Levito Baligod, ginpahayag sini nga ang mga ginahingadlan nga mga ‘ex-Marines’ ang anay security personnel ni former Ako Bicol Rep. Zaldy Co nga nagadeliver sang kwarta sa pila ka mga opisyal sang gobyerno.
Gintuad man ni Baligod nga ang 18 ka mga ex-marines ang nagpabaylo sang $2 million nga ginpahayag para kuntani sa mga International Criminal Court (ICC) investigators apang gintugyan ini kay anay Senador Antonio Trillanes IV nga hugot man nga ginpanginwala ini nga alegasyon.
Suno kay Castro, mga ‘smear campaign’ lamang ini batok kay Marcos kag gintugyan na sa National Bureau of Investigation (NBI), Philippine National Police (PNP) kag Department of Justice (DOJ) ang pag-imbestigar batok sa mga ginapahayag sala nga alegasyon kay Marcos.
