Iloilo – Dako nga bugal para sa 4th district ang desisyon sang Commission on Higher Education nga isa na ka unibersidad ang Iloilo State University of Fisheries Science and Technology.
Sa interview sang Bombo Radyo kay Dr Nordy Siason, President sang unibersidad, iya ginpahayag nga pagahugtan sang akademya ang standard sang admission policy para maghatag sang de-kalidad nga edukasyon sa mga estudyante.
Suno kay Dr. Siason, mangin strikto ini sa mga policies sang unibersidad ilabi na ang mga board- based courses kaangay sang education, fisheries, kag agriculture.
Ini nga kahigayunan ang magahatag sang dako nga bulig ilabi na sa mga estudyante nga halin pa sa malayo nga lugar sa Probinsya sang Iloilo.
Ginpasiguro man ni Dr. Siason nga ang kalidad sang edukasyon sa ila unibersidad ang kaangay man sa mga unibersidad sa syudad sang Iloilo.
Nahibaluan nga ang unibersidad ang may ara sang lima 5 ka campuses — Tiwi, Barotac Nuevo Main Campus; Dumangas Campus; Poblacion, Barotac Nuevo Campus; Dingle Campus; kag San Enrique Campus.
