Nagalaum ang Iloilo City Government nga mahatag na sang National Inter-Agency Task Force kag sang Department of Health subong nga semana ang unified policy may kaangtanan sa pagdumala sang mga ospital sa mga pasyente nga napatay apang indi positibo sa coronavirus disease 2019 (COVID-19).
Ini ang may kaangtanan sa mga kaso sang iban nga expired nga pasyente nga gin-cremate matapos ginkabig COVID-19 suspect apisar ang rason sang kamatayon amo ang vehicular accidents kag iban pa nga sakit sa lawas.
Sa interview sang Bombo Radyo kay Mr. Jeck Conlu, COVID-19 team spokesperson sang syudad, iya ginpahayag nga ini nga concern sang Iloilo City ang napalab-ot naman kay General Melquiades Feliciano, Inter-Agency Task Force (IATF) deputy implementer for Visayas.
Ginpahayag man sang natungdan nga ginahatag ang otoridad sa NIATF kag sa DOH bangud sila ang mas nakahibalo kag bangud wala man sang boundary ang Iloilo City Government sa mga pasyente nga naadmit sa ospital.
Suno kay Conlu, kinahanglan gid ang guidelines agud indi na masulit ang natabo sa isa ka siyam ka tuig nga bata nga gin-cremate matapos ginkabig COVID-19 suspect sang napatay ini sang nabunggu-an kag nalapakan sang multicab sa Brgy. Tabuc Suba, Jaro, Iloilo City sang Setyembre 5.
Nahibaluan nga sang na-cremate na ang bata, naggwa nga nagnegatibo ini sa reverse transcription polymerase chain reaction (RT-PCR) test apang wala na sang nahimo ang pamilya bangud ‘protocol’ ini suno sa ospital. #
