Ginrekomendar sang National Bureau of Investigation (NBI) ang pagpasaka sang kaso nga grave threats kag inciting to sedition batok kay Vice President Sara Duterte.
Ini ang kaangot sa iya pamahog nga kun may matabo sa iya may ginsugo na siya nga ipapatay sanday President Ferdinand ‘Bongbong’ Marcos, Jr., First Lady Liza Araneta-Marcos, kag House Speaker Ferdinand Martin Romualdez.
Suno kay NBI Director Jaime Santiago, napasa na ang nasambit nga reklamo sa Department of Justice (DOJ).
Matandaan nga ginpa-subpoena sang NBI ang bise presidente agud pangayuan sang paathag sa mga nangin pamahog sini.
Sa press briefing sang Pebrero 7, ginpanginwala naman ni Duterte nga nagbuya siya sang pahayag nga ipapatay sini si President Marcos.
Suno kay Duterte, wala ini nakadumdom nga nagpagwa ini sang pahayag nga patyon sini ang presidente.
Ginpahayag sini nga ang administrasyon lang ang nagahambal nga may may assassination, assassin, kag gunman.
Ini ang baliskad naman sa ginhambal sini sang Nobyembre 23, 2024 sa diin gin-ako sini sa isa ka video nga may gin-hire ini nga gunman agud magpatay sa Presidente, First Lady kag House Speaker.
