Wala nag-“huo” kag wala man nagpangindi si Vice President Sara Duterte apang gin-sabat sini nga gintukod lamang ang “Uniteam” para sa 2022 elections, kag subong, indi na sila mga kandidato.
Sabat ini sang bise-presidente sang ginpamangkot kun intact pa bala ang Uniteam nga amo ang iya alyansa kaupod kay President Ferdinand Marcos, Jr. sang eleksyon sang 2022.
“Uniteam was the tandem during the 2022 elections. And then ngayon na tapos na ang elections, nanalo na kami. Nagpapasalamat kami sa aming kababayan sa kanilang suporta sa tandem ng Uniteam noong 2022,” pahayag ni Duterte.
Nahibaluan nga madamo na sang isyu nga naplastar nga indi na maayo ang relasyon sa Uniteam ilabi na kasunod sang statement ni First Lady Liza Marcos batok sa Vice President kag mga suspensyon sa mga kaalyado ni anay presidente Rodrigo Duterte.
Sa pihak sini, matandaan nga gintamyaw pa ni President Marcos si Sara sang nagligad nga semana kadungan sang iya kaadlawan.
Sa nagligad nga interviews, gin-athag man sang duha nga maayo ang ila relasyon sa trabaho kag personal apang talalupangdon nga wala gihapon nagasakapanay ang first lady kag bise-presidente.
Nagpamalibad naman si Sara nga magkomento sa mandu ni Marcos nga ilakip ang “Bagong Pilipinas” song and pledge sa weekly flag ceremonies.
