Dismayado ang coalition labor group nga United Labor Panay kasunod sa ginpatuman nga daily minimum wage hike para sa mga mamumugon sa pribado nga sektor sa Western Visayas.
Sa interview sang Bombo Radyo kay Elmer Forro nga amo man ang Secretary General sang Bayan Panay, iya ginpahayag nga tuman ka taas ang inflation rate sa bug-os nga rehiyon nga nagalab-ot masobra nine percent.
Magluwas diri, ginmensyonar man sini ang paghina sang purchasing power.
Nahibaluan nga sa desisyon sang Regional Tripartite Wages and Productivity Board-6, ginpasakaan ang daily minimum wage sa non-agriculture workers sang 40 pesos kag 45 pesos naman para sa mga agriculture workers.
Kasunod sini, may saka man nga 500 pesos para sa mga kabulig sa panimalay kada bulan, nga amo ang nagapasaka sang minimum wage halin sa P 6,500 tubtub sa P 7,000.
Apisar nga dismayado ang balatyagon sang nasambit nga grupo, ginpahayag ni Forro nga magapadayon sa gihapon ang demand sa legislated wage increase nga ipasaka sa Kongreso sa rason nga mas nagakaigo ini nga solusyon sa inflation rate sa baylo nga maghulat lang sang “one time big time” nga mga ayuda.
Dugang pa ni Forro, bisan sa gamay lang nga pagsaka sa wage hike, ginakilala ini bilang kabahin sang paninguha sang tagsa ka mamumugon bangud paagi diri, may yara sang padulongan kun nagahimakas ang kada isa.
Mangin epektibo ang amo nga wage order sa tunga-tunga sang Nobyembre kun matapos na sang National Wages and Productivity Commission (NWPC) ang review kag ma-publish na ang order.
