Tuman nga ginkaalarma sang United Nations ang ginpatigayon nga U.S. strikes kag ang pagdakop kay President Nicolás Maduro sa Venezuela.
Suno sa United Nations, ang natabo isa ka paglapas sa international law.
Ginsiling ni Stéphane Dujarric, spokesman for the U.N. secretary-general nga ang ini nga mga developments ang nagahatag sang mas dako nga implikasyon para sa Latin America kag sa Caribbean.
Nagpanawagan man si Dujarric sa tanan nga involved nga respetuhon ang tawhanon nga kinamatarung kag ang layi.
Kahapon sang gindakop sang United States si Venezuelan President Nicolás Maduro kag ginlupad ini pagwa sa iya nga pungsod.
Ini ang gindunganan sang serye sang strikes sa kapital nga Caracas kasunod sang binulan nga pag-escalate sang pressure sang Trump administration sa amo nga South American nation.
Ang pag-atake sang US kahapon ang naglawig sang 30 minutos kag indi magnubo sa pito ang serye sang pagsigabong nga nagtuga sang kakugmat sa mga tawo.
Kasunod sang insidente, ginsiling ni President Donald Trump nga ang U.S. magadesisyon kun ano ang masunod nga tikang para sa Venezuela.
Suno naman kay U.S. Attorney General Pam Bondi, si Maduro kag iya asawa ang mangatubang sang charges matapos ang indictment sa New York.
Nagpasalig si Bondi nga mangatubang gid sang bug-os nga pwersa sang American justice sa American soil sa American courts sanday Maduro.
Apisar nga si Vice President Delcy Rodríguez ang magabulos bilang presidente, apang wala pa sang kumpirmasyon nga natabo ini.
Nahibaluan nga wala ginakilala sang Trump administration nga si Maduro ang lehitimo nga leader sang Venezuela kag ginsiling nga ginhimo ni Maduro ang Venezuela bilang isa ka criminal enterprise kag hulukmungan sang drug traffickers kag terrorist groups.
Tuman naman ang pagdayaw ni Trump sa amo nga pag-atake sa Venezuela kag ang pagdakop kay Maduro.
