Nagapabilin sa gihapon nga mapag-on ang suporta sang United States military sa Armed Forces of the Philippines (AFP) apisar may ara sang report nga gin-redeploy ang pila ka missile systems halin sa South Korea pakadto sa Middle East.
Suno kay AFP spokesperson for the West Philippine Sea Rear Admiral Roy Vincent Trinidad, wala sang indikasyon nga may ara sang plano ang Washington nga bawion ang ila military assets nga nakabase sa Pilipinas.
Ang United States of America may Visiting Forces Agreement (VFA) sa Pilipinas kag may access sa pila kapasilidad sang Armed Forces of the Philippines (AFP.)
Dala sa mga US assets sa Pilipinas ang Typhon (Mid-Range Capability) missile system, nga naka-deploy halin pa sang 2024.
Dugang pa diri, ang Navy-Marine Expeditionary Ship Interdiction System (NMESIS), nga nag-abot lamang sang nagligad nga tinuig kag ginagamit ini nga mga defense systems sa military exercises.
Pahayag ni Trinidad nga nagsugod na ang US sa pagkuha sang pila ka missile-defense systems halin sa South Korea para i-deploy sa Middle East.
Suno pa sa iya nga nagapadayon ang pagpalapad sang kooperasyon sa tunga sang Pilipinas kag US.
Ginhatagan man sini sang pasidungog ang pag-apruba sang US Congress sang Disyembre 2025 sa Philippine Enhanced Resilience Act, nga nagahatag sang $2.5 bilyon nga security assistance sa masunod nga lima ka tuig.
Ang Pilipinas kag Estados Unidos konektado paagi sa Mutual Defense Treaty (MDT) sang 1951, nga nagapahanumdom sa duha ka pungsod nga magabuligay sa tion sang armed attack.
