ILOILO CITY- Ginpili ni United States Vice President Kamala Harris si Minnesota Gov. Tim Walz bilang running mate sini para sa nagahilapit nga November 2024 presidential elections.
Ini nga tandem sang Democratic Party ang magahangkat sa tandem sang Republican Party nga sanday former President Donald Trump kag Ohio Sen. JD Vance.
Ginhimo ni Harris ang final decision pila ka oras antes ang scheduled campaign rally sa Philadelphia.
Ginapahayag nga ang pagpili ni Harris kay Walz ang makapasangkad sang ila appeal bilang runningmates: si Harris bilang Black, Asian woman halin sa California nga may eksperyensiya bilang prosecutor, kag si Walz bilang white, nga may record sang pagduso sang mga progresibo nga mga polisa.
Ang 60-anyos nga si Walz ang ginbun-ag sa Nebraska ang isa ka former educator kag nangalagad sa Army National Guard sa sulod sang 24 ka tuig.
Nagsulod ini sa pulitika sang 2006 sang nagdaug ini sa iya una nga election sa House of Representatives.
Nagserbe ini sa sulod sang anom ka termino sa kongreso antes naeilihir bilang gobernador sang 2018.
