ILOILO CITY – Ginsulod sang mga armado nga suspek ang compound sang Universal Robina Corporation sugar mill sa Barangay Imbang Pequeño, San Enrique, Iloilo.
Sa interview sang Bombo Radyo kay San Enrique ABC President Jose Fernandez, iya ginpahayag nga antes nasat-uman ang mga suspek, isa ka babaye ang nagsulod sa compound nga may ka-text sa iya cellphone.
Ginpangita sang mga suspek ang misis ni Engr. Warren Bitolin Mesa kag nagpakilala nga ginsugo sila sang engineer nga kuhaon ang salakyan sini nga Pajero.
Gilayon naman gintawgan sang misis ang engineer kag nakumpirma nga wala ini may ginsugo para kuhaon ang salakyan.
Nagpalagyo naman gilayon ang tatlo ka mga armado nga suspek kaupod ang babaye nga una nagsulod sa compound.
Sa karon ginahibalo pa sang kapulisan sa banwa sang San Enrique ang identity sang mga suspek.
Nahibaluan nga sa karon nakaalerto ang bug-os nga puwersa sang kapulisan sa probinsiya sang Iloilo bangud sa pamahog nga pag-atake sang New People’s Army (NPA).