ILOILO – Padayon subong nga ginatun-an sang Iloilo City government kag Iloilo provincial government ang unsolicited proposal sang Aboitiz InfraCapital Inc., para sa bulk water supply project.
Katuyuan sini nga i-privatize ang Iloilo Bulk Water Supply Project sa Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga gin-reject niya ang proposal kag sa subong ginatun-an kun i-reconsider.
Suno kay Treñas, tuman kamahal ang sukot sang nasambit nga kumpaniya nga P51.00 per cubic meter.
Ginpahayag sang alkalde nga kinahanglan pa niya nga tun-an ini sang maid-id.
Samtang, suno naman kay Iloilo Governor Arthur Defensor, Jr., padayon pa niya nga ginatun-an ang proposal nga ginpasa sang kumpaniya.
Suno sa gobernador, tuman pa ka temprano agud magpagwa ini sang pahayag sa nasambit nga proposal.
Nahibaluan nga sakop sang Iloilo Bulk Water Supply Project, ang construction, operation, kag maintenance santo sa Build-Own-Operate and Build-Lease contractual arrangement.
Sa idalom sini, mabaligya ang Aboitiz sang treated bulk water sa mga implementing agencies, kag i-resell naman ini sa water distributors kag third-party purchasers.
Nagadangat naman sa P8.45 billion ang nasambit nga water supply project kag ginalauman nga magahatag sang 80 million liters sang potable treated water kada adlaw sa Iloilo sa sulod sang concession period nga 33 ka tuig.
