Napuhag sang bomb threat ang University of The Philippines Visayas- Iloilo City Campus kaina sang aga.
Sa interview sang Bombo Radyo kay Gerthrode Charlotte Tan Mabilog, information section head kag faculty man sang unibersidad, iya ginpahayag nga nakabaton sang mensahe sa messenger ang pila ka mga estudyante.
Suno kay Mabilog, ang threat nagsugod bilang isa ka spam message nga nag-circulate paagi sa isa ka gin-hack nga Facebook account sang isa ka UP High School nga estudyante.
Pahayag niya, ang amo nga estudyante ang ginapahayag nga nadulaan sang access sa iya account antes naglapta ang mensahe.(UPV 333)
Madasig nga naglapta ang amo nga mensahe kag nagresulta sang kabalaka sa mga estudyante.
Bangud sa insidente, gilayon gin-suspend ang face-to-face classes.
Natigayon naman nga ma-clear sang Philippine National Police (PNP) kag sang bomb squad ang bilog nga campus.
