ILOILO CITY – Bukas ang University of the Philippines Visayas – Tubong Mindanao Organization sa pagbaton sang mga donasyon para sa mga biktima sang linog sa Mindanao.
Paagi sa Bombo Radyo, nagapanagawan sang bulig si Kyrus Makul, tumandok sang Cagayan de Oro City kag Vice President for Internal Affairs sang nasambit nga organisayson.
Umpisa buwas, Nobyembre 4 tubtub Nobyembre 8 suno kay Makul, may yara sang donation drive ang ila organisasyon sa diin may yara sang igapahamtang nga donation boxes sa Iloilo City Campus.
Labi nga ginakinahanglan sang mga taga-Mindanao suno kay Makul amo ang matinlo nga tubig, trapal ukon tent, sanitary napkins kag emergency lights.
Mas makapaayo man suno sa natungdan kun kwarta ang igadonar agud nga mas mapadali ang pagpalab-ot sang bulig sa mga apektado sang linog.
Samtang, pagtib-og sa cultural differences sang tagsa ka estduyante ang kawsa sa pagtukod sang University of the Philippines- Visayas – Tubong Mindanao Organization.
Sa interview sang Bombo Radyo kay Ice Ciano, tumandok sang Butuan City, Vice President for External Affairs sang UP Visayas – Tubong Mindanao Organization, iya ginpahayag nga nanari-sari nga lugar ang ginhalinan sang mga estudyante nga naga-eskwela sa University of the Philippines – Visayas.
Ang UP – Tubong Mindanao Organization suno kay Ciano ang isa ka organisasyon sang mga estudyante nga naghalin sa nagkalain-lain nga lugar sa Mindanao.
Agud nga mangin miyembro sang organisasyon, may yara sang form nga dapat ipasa agud nga makaparehistro sa Office of the Student Affairs.
Magluwas sa mga tumandok, bukas man ang organisayson suno kay Ciano sa mga estudyante nga halin sa iban nga lugar apang maluyag nga hibaluon ang kultura sang Mindanao.
