Ginpadala sang Estados Unidos sang Amerika ang military aircraft sini agud nga magdul-ong sang humanitarian assistance and disaster response (HADR) equipment sa Pilipinas.
Sa tunga ini sang lapnagon nga baha sa nagkalain-lain nga parte sang pungsod bangud sa epekto sang habagat kag sunod-sunod nga mga bagyo.
Suno kay Major Joseph Richard Calma, assistant chief sang Philippine Air Force (PAF) Public Affairs Office, ang KC-135 aircraft ang ginpadala sang US kag ginalauman nga maghugpa sa Clark Air Base sa Mabalacat, Pampanga, apang wala lang sang ginhatag nga eksakto nga oras sa pag-abot sini.
Wala man sang detalye nga nahatag kun magabulig ini sa disaster response magluwas sa pagdul-ong sang equipment.
Ini nga KC-135 Stratotanker amo ang aerial refueling and airlift aircraft sang US Air Force nga mahimo maka-karga sang cargo kag mga pasyente sa tion nga may aeromedical evacuations.
Sa bahin naman sang PAF, naka-standby ang masobra 40 ka air assets sini kun sa diin ang pila ang naka-preposition sa Clark Air Base kag sa Basa Air Base nga lunsay sa Pampanga.#
