Gindayaw ni United States Defense chief Lloyd Austin ang speech ni President Ferdinand Marcos, Jr. sa atubang sang international community sa 21st International Institute for Strategic Studies-Shangri-La Dialogue defense summit sa Singapore.
Suno kay Austin, husto ang ginpanghambal ni Marcos kaangot sa rule of law kag sa West Philippine Sea bangud kada pungsod — gamay man ukon daku — ang may kinamatarong nga angkunon ang kaugalingon nga maritime resources kag maglayag sang hilway samtang nga ginatugutan sang international law.
Ginsiling man sang opisyal nga delikado ang mga harassment sa Pilipinas sa amo nga teritoryo.
“The harassment that the Philippines has faced is dangerous—pure and simple. And we all share an interest in ensuring that the South China Sea remains open and free,” pahayag sini.
Kadungan sini, iya man ginpasalig nga magapadayon ang Estados Unidos sang Amerika sa pagtungod sang papel sini sa Indo-Pacific. Gindayaw man sini ang pila ka partnerships sa rehiyon lakip na ang iya sang US, Japan kag South Korea kag US, Japan, Australia kag Pilipinas.
“Now, sustaining this progress will take teamwork. It will take resolve. And it will take leadership. And so that’s why my belief in the power of partnership has never wavered,” pahayag pa ni Austin.
Matandaan nga sa amo nga dayalogo, gindeklarar ni Marcos nga isa na ka “act of war” kun may isa ka Pilipino nga mapatay bangud sa pagpang-atake sang China Coast Guard sa West Philippine Sea. Pahayag pa ni Marcos, pat-od nga magasaka man ang lebel sang response kun mabuhinan ang Filipino serviceman —Coast Guard, militar man ukon Navy — bangud sa aktwasyon sang China.
Sa iya keynote address, ginpahayag man sini nga padayon nga itib-ong sang iya administrasyon ang soberanya sang Pilipinas kag proteksyunan ang teritoryo sang pungsod sa tunga sang mga pagpanghangkat. Ginsiling sini nga indi siya mag-atras kag mangampo amo man ang mga Pilipino.
Pahayag pa sini, himuon sang gobyerno ang kutob sang iya masarangan agud proteheran ang legal territory sang pungsod sandig sa nakabutang sa 1982 United Nations Convention on the Law of the Sea kag sa 2016 Arbitral Award. Indi ini imahinasyon lang kag baseless claim suno sa presidente bangud ang ginakabig nga teritoryo sang Pilipinas ang nakabase sa international law.
