Ginpamatud-an liwat ni U.S. Defense Secretary Pete Hegseth ang “ironclad” nga promisa sang Washington sa isa ka defence treaty upod sa Pilipinas, kon sa diin nagpangako nga magbutang sang advanced capabilities sa iya kaupod sa pagpabakod sang pagpugong batok sa mga pamahog, lakip ang “agresyon” sang China.
Nakigkita si Hegseth sa iya katupong nga si Gilberto Teodoro kag kay President Ferdinand Marcos Jr. kag gintumod nila ang padayon nga mabaskog nga pagbinuligay sa tunga sang nagadaku nga mga pamahog gikan sa China, nga nagapadaku sang commitment sa kalinong sa Indo-Pacific Region kag sa West Philipiine Sea, sa diin gina-akusahan sang Manila ang Beijing sang sulit-sulit nga mga agresyon.
Gin-athag man sini nga wala nagapangita sang inaway ang Estados Unidos kag ginlaragway niya si Presidente Donald Trump bilang isa ka peacemaker.
Ang Pilipinas amo ang first stop ni Hegseth sa isa ka trip sa Asya.
Si Hegseth nagsiling nga ang Estados Unidos magadeploy sang dugang nga mga advanced capabilities sa Pilipinas nga magalakip sang NMESIS anti ship missile system kag unmanned surface vehicles nga iya ginlaragway nga “highly capable”.
Suno sa iya, nagkasugtan man sila nga magpatigayon sang bilateral special forces training operations sa na-aminhan nga isla sang Pilipinas nga Batanes, malapit sa Taiwan.
Si Marcos ang nagpromisa man nga magtrabaho sang suod upod sa Washington sa pag-amlig sang regional stability kag nagsiling nga ang pagbisita ni Hegseth, isa ka tanda sang suporta sang Estados Unidos para sa iya kaalyado sa kasugtanan.
Ang pagsinapol ginhiwat sa likod sang tensyon sa tunga sang Pilipinas kag sang nagadugang nga aktwasyon sang China sa ginaawayan nga mga isla sa West Philippine Sea, sa diin ang duha ka pungsod masami may maritime run-in.
