Indi na magpakita sa polling places si US President Joe Biden subong nga adlaw kundi maga-monitor na lamang sa White House kun ano ang mangin dalagan sang piniliay sa tunga nanday Vice President Kamala Harris kag former President Donald Trump.
Suno sa iya long-time aides kag senior White House staff, kaupod ni Biden nga magabantay sa election results ang iya asawa nga si First Lady Jill Biden. Wala man sila sang iban nga kadtuan nga public events subong nga Nobyembre 5 (petsa sa US).
Matandaan nga isa ka semana na ang nagligad, nagkadto ang 81-anyos nga current president sa Wilmington, Delaware kag nag-upod sa grupo sang first-time voters sa isa ka early voting location.
Si Biden amo kuntani ang orihinal nga magaatubang kay Trump sa eleksyon sa pagka-presidente subong nga tuig — isa ka maragtason nga rematch nga wala nadayon matapos nag-atras si Biden sang Hulyo 21 kag gin-endorso si Harris nga magapanguna sa Democrats.
Ang withdrawal ni Biden sa reelection campaign ang kasunod man sa iya pigado nga performance sa una nga presidential debate batok kay Trump. Nag-ulan ang malain nga reaksyon sa amo nga debate bangud madamo na sang bal-ot sa ginapanghambal ni Biden kag nagakalipat sang isugpon — bagay nga ginaangot sa iya edad kag ginasiling nga makaapekto man sa iya liderato.
Samtang yara sa White House ang current president, mataas ang seguridad nga ginahatag sang Secret Service kaangay sang pagtukod sang walo ka tapak nga metal fences.#
