Nakaboto na sa 2024 US elections si former President kag subong Republican candidate Donald Trump.
Kaupod sang 78-anyos ang iya asawa nga si Melania sang nag-abot sa polling booth sa Florida.
Ini kasunod man sang bag-o lang ginpaguwa nga una nga resulta sa presidential elections — halin sa gamay nga lugar nga Dixville Notch sa New Hampshire kun sa diin tag-tatlo ka boto ang naangkon nanday Trump kag kasumpong sini nga si Democratic candidate Vice President Kamala Harris.
Si Trump, 78, amo ang labing-una nga former American president sa maragtas sang nasyon nga na-convict sa krimen nga felony.
Gindeklarar sang huwes nga guilty ini kasunod sang 34 charges bangud sa scheme nga iligal nga impluwensyahan ang 2016 election paagi sa hush money payment sa isa ka porn actress nga si Stormy Daniels.
Apisar na-anunsyo na direkta halin sa Manhattan, New York ang desisyon nga convicted si Trump sang Mayo, natalana nga ipaguwa ang sentensya sini sa Nobyembre 26.
Sa idalom sang layi sa Florida, kun ang isa ka botante ang may yara sang out-of-state conviction, iga-defer sang Florida sa layi sang sina nga state kun paano makuha liwat sang felon ang iya nga kinamatarong sa pagboto.
Para sa kaso ni Trump, buot silingon sini, nakabenepisyo siya sa 2021 law sang New York nga nagapahanugot sa mga tawo nga may felony convictions nga magboto sa kondisyon nga wala sila nagaserbe sang term of incarceration sa tion sang eleksyon.
Antes kay Trump, nakaboto naman ang iya runningmate nga si Ohio Senator JD Vance sa Cincinnati, Ohio.
Magpadayon sa pagbantay sa US election updates sa Bombo Radyo Philippines nga dal-on sang masobra 150 ka Bombo International correspondents direkta halin sa nagkalain-lain nga states sa Estados Unidos sang Amerika.
