Arestado ang isa ka lalaki nga may dala nga sulu kag flare gun sang nagtuyo ini nga magsulod sa Capitol Visitor Center sa Washington, DC kadungan sang presidential election sa Estados Unidos sang Amerika.
Gin-post sang U.S. Capitol Police sa ila official account sa X ang notice of the arrest pasado ala una sa hapon (local time).
Wala sang session ang U.S. House of Representatives kag ang U.S. Senate sang natabo ang insidente.
Ini nga visitor center ang naga-serbe nga starting point para sa tours sa Capitol kag bukas ini adlaw-adlaw bisan may session ukon wala ang Kongreso.
Sandig sa post sang department, nadakpan ang lalaki sa screen process sang na-notisyaran sang officers nga nagapanimaho ini sang fuel. Sang gin-check, didto na nakit-an ang sulu kag ang flare gun.
Bangud sini, temporaryo nga gin-untat ang tours sa center kag gina-imbestigaran pa ang motibo sang lalaki.
Nahibaluan nga ginpasaka ang security precautions sa bilog nga district kadungan sang eleksyon sa Estados Unidos. Lakip diri ang gintukod nga temporary fencing sa palibot sang White House, Eisenhower Executive Office Building sa Capitol complex kag sa Naval Observatory nga amo ang ginapuy-an sang vice president.
****
Magpadayon sa pagbantay sa US election updates sa Bombo Radyo Philippines nga dal-on sang masobra 150 ka Bombo International correspondents direkta halin sa nagkalain-lain nga states sa Estados Unidos sang Amerika.#
